آج اسلام آباد ہائی کورٹ نے میاں نواز شریف کی پنامہ ٹرائل فیصلہ معطل کرنے کی درخواست کی سماعت کی

خواجہ حارث صاحب نے بنچ کو بتایا کہ نیب قانون کے تحت استغاثہ کو میاں نواز شریف کے خلاف ملکیت، اثاثے اور ذرائع آمدن دکھا کر آمدن سے زائد اثاثوں کا مقدمہ ثابت کرنا تھا جس میں نیب ناکام رہا ہے لہذا بار ثبوت میاں نواز شریف کی طرف منتقل ہی نہیں ہوا کہ ان سے منی ٹریل مانگی جاتی۔ خواجہ صاحب نےنیب گواہان کے بیانات پڑھ کر سنائے جس میں انہوں نے واضح طور پر تسلیم کیا کہ کوئی ایسا ثبوت یا گواہ نہیں ہے جو میاں نواز شریف کو براہ راست یا بے نامی یا اپنے زیر کفالت افراد کے ذریعے مذکورہ جائیدادوں کا مالک بتاتا ہو۔ اس پر بنچ نے سوال کیا کہ کیا کوئی ایسا قانون موجود ہے جس کے مطابق بچوں کی جائیداد کو والد کی جائیداد قرار دیا جا سکتا ہو جبکہ بے نامی جائیداد کا کوئی ثبوت نہ ہو۔ خواجہ حارث نے جواب دیا کہ ایسا کوئی قانون نہیں ہے۔ بنچ نے استفسار کیا کہ فیصلے میں جج صاحب نے کس قانون پر انحصار کیا ہے تو خواجہ صاحب نے بتایا کہ کسی قانون پر انحصار نہیں کیا گیا بلکہ جج صاحب نے لکھا ہے کہ ’’چونکہ عمومی طور پر بچے والد کی کفالت میں سمجھے جاتے ہیں لہذا‘‘۔ اس پر بنچ نے خواجہ صاحب سے فیصلے میں سے مذکورہ صفحات اور سطور پڑھوائے اور ان کو نوٹ کیا۔

خواجہ صاحب کی دلیل یہ بھی تھی کہ نیب کے کسی گواہ نے لندن فلیٹس کی قیمت تک نہیں بتائی جس سے ثابت ہوتا کہ کہ کیسے لندن فلیٹس ذرائع آمدن سے بڑھ کر تھے۔ اس پر بنچ کو شدید تعجب ہوا اور وہ بے یقینی سے پوچھنے لگے کہ کیا واقعی ایسا ہوا ہے جس پر خواجہ حارث نے نیب گواہ کا بیان پڑھ کر سنایا جس میں وہ خود تسلیم کرتے ہیں کہ انہوں نے لندن فلیٹس کی قیمت کا تعین نہیں کیا۔ اس پر جسٹس اطہر من اللہ بولے کہ اگر اثاثوں کی قیمت ہی نہیں معلوم تو یہ کیسے کہا جا سکتا ہے کہ یہ اثاثے آمدن سے زائد ہیں۔

عدالت نے پندرہ تاریخ کو خواجہ صاحب کو دلائل کمل کرنے کا کہا ہے جبکہ نیب کے وکلا کو دلائل کے لئے سولہ اگست کی تاریخ دی گئی ہے۔
احمد علی کاظمی